CEBU, Philippines — Nikabat ngadto sa 289 ka mga public utility vehicles (PUV's) ang nakabaton na og special permit to operate gikan sa Land Transportation Franchising and Regulatory Board (LTFRB)-7.
Sa maong gidaghanon nga nagbaton og special permit, nikabat ngadto sa 281 ka bus ug walo ang modern public utility jeepney.
Ang maong mga PUV gitugotan kining mobiyahe o makapamasada diha sa mga dapit nga gi-down grade ang classification sa Inter-Agency Task Force (IATF) ngadto sa general community quarantine (GCQ).
Matud sa direktor sa LTFRB-7 Eduardo Montealto nga ang 155 ka bus maoy gitugotan sa pagbiyahe sa mga dapit sa Sugbo nga gipaubos sa GCQ ug ang 13 ka bus ug walo ka modern PUV mao usab ang gitugotan sa pagpamasahero sa Dakbayan sa Lapu-Lapu nga ubos na sa GCQ.
Gitataw ni Montealto nga sukad sa ilang pagsugod sa operasyon niadtong Mayo 20, 2020 wala sila makasugat og kakulian sa mga nagbiyahe nga pasaheroang sakyanan gawas lang sa amihanan nga wala dayon madumdumi ang gihimong terminal diha sa Sta. Lucia Square sa Poblacion Oriental, Lungsod sa Consolacion.
Hinuon temporaryo lang ang maong terminal ug gilauman ang pagbalik sa naandan nga terminal diha sa Barangay Subangdaku, Dakbayan sa Mandaue sa higayon nga ang maong siyudad ma-down grade na usab sa IATF ngadto na sa GCQ sugod sa Hunyo 1, 2020. /BDB (BANATNEWS)