CEBU, Philippines — Ang Dakbayan sa Danao padayon gihapon sa odd-even scheme alang sa mga dili molupyo sa lugar kinsa buot mosulod sa siyudad.
Kini bisan pa nga ubos na sa general community quarantine (GCQ) ang maong dakbayan.
Base sa post diha sa facebook page sa Danao City Government gipahibalo nga subay sa City Ordinance No. 2020-16-009 Section 6 nga ang uwahi nga number sa quarantine pass sa mga dili residente sa Danao maoy basehanan sa schedule sa adlaw nga makasulod sila sa siyudad.
Kadtong quarantine pass nga adunay control number nga nagtapos sa even numbers sama sa 0, 2, 4, 6, 8 sa adlaw nga Martes kini mamahimong makasulod sa siyudad samtang kadtong control number sa quarantine pass nga nagtapos sa odd number sama sa 1, 3, 5, 7, ug 9, sa adlaw nga Miyerkules ang schedule nila nga makasulod.
Alang sa mga mosulod sa Danao gamit ang ilang sakyanan kinahanglang adunay mapakita usab nga vehicle pass nga giisyu sa ilang LGU.
Ang makalapas sa ordinansa sa Dakbayan sa Danao adunay ipahamtang nga silot diin sa unang kalapasan i-reprimand lang o pahinumduman, sa ikaduhang kalapasan makabayad na og P500 nga multa samtang sa ikatulo nga kalapasan P1000 ang multa o lima ka adlaw nga pagkapriso.
Lakip usab sa post sa facebook page sa siyudad nga kadtong naggikan sa mga lugar nga adunay mga positibo sa covid-19 tugotan kining makasulod sa Dakbayan sa Danao kong makapakita kini og medical clearance certificate nga nagpamatuod nga wala silay contact sa tawo nga gidudahang nataptan sa virus o nakakompleto na sila sa quarantine. /BDB (BANATNEWS)