CEBU, Philippines — Ang mga na-stranded ngadto sa ubang mga lungsod ang tugotan na sa Probinsiya sa Sugbo nga makapauli.
Si Gobernador Gwendolyn Garcia sa Probinsiya sa Sugbo nagkanayon nga mamahimong makauli sa mga lugar diin nagpuyo ang mga Sugboanon nga na-stranded ngadto sa laing mga lungsod o siyudad kong adunay pagtugot gikan sa ilang mayor.
Ug kong naggikan sa Dakbayan sa Sugbo ang mga mouli ngadto sa mga lungsod sa probinsiya ipaubos kini og PCR test o swab test.
Si Garcia nagkanayon nga ang mga Local Government Unit maoy modesisyon kon papaulion nila ang mga buot mouli hilabina ang gikan sa Dakbayan sa Sugbo.
Ang mayor sa Lungsod sa San Remegio Mariano Martinez ug mayor sa Lungsod sa Medellin Joven Mondigo nipadayag sa ilang concern sa mga anaa karon sa Siyudad sa Sugbo kinsa gustong mouli sa ilang lungsod.
Matud nila nga posibleng adunay mopauli nga magdala sa tibuok nilang pamilya.
"Dapat siguradohon ninyo nga residente gyud na sa inyong barangay o lungsod kay basin og 30 ka tuig na na nagpuyo sa Cebu City, botante na didto unya mouli lang, aw, dili na na stranded. Ang stranded katong naa ray tuyo sa siyudad unya naabtan lang sa ECQ", ni Garcia pa.
Ang Kapitolyo andam kini nga mo-assist ngadto sa mga mopauli uban sa koordinasyon sa LGU apan kadtong nagpakita og sentomas maoy i-prioritize sa pagkuha og swab. Ang dili ma-swab unya gusto na nga mouli anaa ra sa mayor kon dawaton kini diin mamahimong i-subject lang sa health protocols sama sa 14-day quarantine. /BDB (BANATNEWS)