Mga sakyanan naghuot sa SRP

CEBU, Philippines — Nilanat gyud hangtud sa gabii ang trapik sa South Road Properties (SRP) paingon sa dakbayan sa Talisay niadtong Martes.

Kini human daghang sakyanan ang dungan nga nigawas ug mosulod sa dakbayan sa Talisay.

Si Police Major Gerard Ace Pelare, ang hepe sa Talisay City Police Station, nibutyag nga dili gyud normal ang gidaghanon sa mga sakyanan sa miaging adlaw.

Siya nagkanayon nga nag-one entrance, one exit sila sa SRP apan kadto lang adlawa ang nalahi gumikan sa taas nga kutay sa mga sakyanan nga gustong mosulod sa siyudad sa Talisay.

Si Mayor Gerald Anthony “Samsam” Gullas Jr. nitan-aw sa sitwasyon ug nakaingon nga gumikan kini sa estriktong pagpatuman sa kapolisan sa mga buot mosulod sa siyudad.

Matud pa ni Pelare nga daghang sakyanan ang ilang gipabalik sa agi tungod kay walay igo silang dokumento nga makasulod sa Talisay.

Siya niingon nga wala nila gipaubos ang ilang bakus aron lang kapugngan ang pagkuyanap sa virus kun diin ang siyudad sa Sugbo naila na nga epicenter sa maong virus dinhi sa Central Visayas. /LPM (BANATNEWS)