CEBU, Philippines — Bisan pa man nga libkason ang pagpatuman sa Enhanced Community Quarantine sa tanang nga probinsiya sa Central Visayas, istriko gihapon ang pagpatuman sa social distancing.
Kini maoy gibutyag ni Police Regional Office 7 Director Albert Ferro diin iyang pabutangan gihapon og polis ang mga pangpublikong lugar lakip na niini ang mga malls.
Dugang ni Ferro nga bisan gipahibalo sa Malacañang nga ang General Community Quarantine (GCQ) ang new normal hangtud wala pay vaccine sa pagpatay sa novel coronavirus padayon ang pagdakop nila sa dili motuman sa protocol.
Kini sama sa dili pagdala og Quarantine Pass, pagsuroy-suroy sa mga menor de edad, ug ang mandatory nga pagsul-ob og face mask sa pangpublikong lugar.
Sa pagkakaron nagpabalin nalang nga ubos sa ECQ sa rehiyon mao ang Dakbayan sa Mandaue, Lapu-Lapu, Probinsiya ug Dakbayan sa Sugbo hangtud sa Mayo 15.
Samtang ka gahapon gilibkas na ang ECQ ngadto sa GCQ sa Negros Oriental, Bohol ug Siquior human nga wala nay nadugang nga kaso sa COVID-19. /GMR (BANATNEWS)