‘Ex-Mayor’ sa prisohan, igsuong babaye dakpan
CEBU, Philippines — Wala kaugpo ang kanhi mayor sa bilanggoan ug iyang igsuon nga babaye nga mabdos sa gipahigayon nga buy-bust operation sa Drug Enforcement Unit sa Abellana Police Station alas 2 kagahapon sa hapon sa may Gen. Maxilom Avenue, Kamputhaw, Siyudad sa Sugbo.
Ang dinakpan mao si Raymark Navarro Avenido alyas Emac, 30, subject sa operasyon nga anaa sa drug watchlist high-value individual city level ug Radylyn Navarro Avenido alyas Mikay, 27, pulos nag puyo sa Ponce 2, Carreta, Siyudad sa Sugbo.
Matud ni Police Major Elisandro Quijano nga usa ka semana nilang gi-monitor ang kalihukan sa managsuon nga Avenido.
Dugang pa ni Quijano nga 100 gramos matag semana ang mabaligya sa managsuon.
Dugang pa sa managsuon nga Avenido nga duha na ka tuig sila namaligya og ginadiling drugas.
Atol sa operasyon nakuha sa ilang posisyon ang 75 gramos sa gidudahang shabu nga mobalor og P510,000.
Ang mga dinakpan gibalhug sa Abellana Police Station ug pasakaan og kasong kalapasan sa Section 5 ug 11 Article 2 sa Republic Act 9165.
Sikop sa drug den
Samtang usa ka drug den ug lima ka adik ang nadakpan sa gihimo nga buy-bust operation sa Purok Magnolia, Tungkil, Minglanilla kagahapon sa alas 2:30 sa kaadlawon.
Ang subject sa operasyon nailhan nga si Rolly Perdugas Abadiano alyas Boknoy samtang ang mga adik nga uban kaniya mao sila si Ronald Campaña Adlawan, Rovergey Balagon Petangue, Larry James Velarde Pelabo, Adonis Llamedo Abellana ug Bady Briones Cabañero.
Ang grupo sa Provincial Intelligence Branch (PIB) sa Cebu Provincial Police Office (CPPO) nakigsabot ni Abadiano nga mopalit og ilegal nga drugas.
Wala magdugay nahimo ang transaksyon ug nasikop ang mga suspek.
Nilutaw ang pangalan ni Abadiano gumikan sa mga sumbong gikan sa mga tawo.
Nakuhaan sila og 26 ka pakete sa shabu nga nitimbang og 16 gramos nga adunay gibana-bana nga balor nga P108,800.
Ang mga dinakpan gibalhug sa bilangguan ug gikatakdang pasakaan og kaso. Gabriel C. Bonjoc/GMR (BANATNEWS)
- Latest