Duha gi-salvage gilabay sa Talisay

CEBU, Philippines — Duha ka wa ilhing lalaki ang napalgang patay diha sa Sitio Camp 4, Barangay Manipis, Dakbayan sa Talisay kagahapon sa buntag. Nakadawat og tawag ang kapulisan sa Dakbayan sa Talisay labot sa pagkakaplag sa mga residente sa mga patay nga lawas.

Ang mga nirespondeng polis nakahinabi sa usa sa mga residente  ug kini nga mialegar nga  nakakita kini ug mga higala og usa ka puti nga van ingon man itom nga sakyanan nga mihunong sa maong lugar ug daw aduna kini gilabay.

Sa una, nagtuo lang sila nga basura ra kini nga giitsa sa mga nagsakay sa sakyanan. Usa ka 34 anyos sab nga babaye ang nisusi sa gilabay nianang pagkakadlawon ug diha na nila nahibaw-an nga tawong wala nay kinabuhi kadto.

Si Police Major Gerard Ace Pelare, pangu sa Talisay City Police Station nagkanayon nga naputos sa samad pinusilan ang mga biktima.

Nagtuo sila nga gipatay nang daan ang duha dayon gilabay. Sa pagsuwat ning balita, wa pa ilhi ang mga patay’ng lawas. Blanko pa sab ang kapulisan sa motibo sa krimen. /IBM (BANATNEWS)