CEBU, Philippines — Ang kagamhanan sa Dakbayan sa Sugbo nipahiluna sa mga walay kapuy-an ug mga libudsuroy niining panahon sa enhanced community quarantine.
Kini ang gipahibawo ni Mayor Edgardo Labella.
Ang kagamhanan sa siyudad temporaryong nipapuyo sa mga walay kapuy-an ug libudsuroy diha sa sports complex sa Barangay San Roque ingon man diha sa Barangay San Nicolas Proper.
Si Labella nipasalamat sa mga kapitan sa nahisgutang mga barangay sa pag-akumodar usab sa maong mga walay kapuy-an.
Gipasalamatan usab ni Labella ang Ramon Aboitiz Foundation ug ang Office of the Presidential Assistant for the Visayas tungod kay sila maoy naghatag og pagkaon alang sa walay kapuy-an ug libud-suroy.
Gipahibawo usab ni Labella nga ang kagamhanan sa siyudad sukad sa unang adlaw naghatag og pagkaon sa mga frontliner lakip niini ang mga polis, medical personnel ug uban pa.
Sayo pa, ang konseho sa siyudad nipalabang og resolusyon nga nag-awhag sa kagamhanan sa siyudad paghatag og pagkaon sa mga frontliner.
“Although naa na nga resolution nga nigawas niadtong niaging semana sa city council but long before since day one ato nang gibuhat”, ni Labella pa. /BDB (BANATNEWS)