Social amelioration card ihatud sa balay
CEBU, Philippines — Giawhag ni Lapu-Lapu City Mayor Junard “Ahong” Chan ang mga Oponganon nga magpabilin lang sa ilang panimalay tungod kay ihatud ra ang social amelioration card sa mga kwalipikado nga beneficiary.
Matud ni Chan nga ang 12,000 ka cards libre kini ug ipanghatag kini pinaagi sa City Social Welfare and Development.
Giingong dunay mga nag-download sa computer sa porma ug gipakopyanan ug gibaligya sa tag P30 apan dili magamit tungod kay dunay barcode.
Giawhag ni Chan ang mga tawo nga anha lang sa mga panimalay ug paaboton ang taga CSWD.
Ang pangulo sa CSWD nga si Annabeth Cuizon nipasabot nga ang matag card adunay barcode alang gyud sa maong household o head sa family hinungdan nga nakurat siya nga adunay niduso og SAC nga adunay pirma sa opisyal sa barangay.
Gtug-an ni Cuizon nga ang card gikan sa CSWD maoy balido ug iapod-apod nila sa mga panimalay uban sa instruction kung unsaon sa pag-fill-up. – Rowena D. Capistrano/GMR
Mobile app sa PUM ma-download na
Gimanduan ni Gob. Gwendolyn Garcia ang mga Sugboanon nga mag-download og WeTrace App alang sa pag-monitor kun natakboyan ba og coronavirus disease.
Ang WeTrace App usa ka mobile app nga gi-develop sa usa ka Sugboanon alang sa pag-monitor sa tawo nga dunay severe acute respiratory infections, influenza-like illnesses o kadtong giila nga persons under monitoring ug adunay sintomas sa COVID-19.
“The WeTrace App has been developed to accurately trace and monitor, with utmost privacy and confidentiality,” pagbasa sa bag-ong executive order sa gobernador.
Pinaagi sa maong app, ang mga PUMs mahimo nga mopahibalo ngadto sa awtoridad kun makasinati og sintomas sa COVID-19.
Sa maong mobile app anaa usab ang pipila ka impormasyon kalabot sa update sa COVID-19 sama kun pila na ang kaso base sa report sa Department of Health. /GMR (BANATNEWS)
- Latest