Chan: Yuri negatibo sa COVID-19

CEBU, Philippines — Nakaginhawa ang mga molupyo sa sa Barangay Bankal sa Dakbayan sa Lapu-Lapu human nga gipahibalo ni Lapu-Lapu City Mayor Junard Chan sa iyang Facebook account kagahapong adlawa nga negatibo sa COVID-19 si Yuri sa gihimong test sa DOH.

Ang iyang post miani og daghang pasalamat gikan sa iyang mga followers. Ang mayor nagpasalamat sa tanang nitabang sa pagampo.

Sayo kagahapong adlawa, gipaubos sa mandatory quarantine ug gipa-lockdown sa kagamhanan sa Dakbayan sa Lapu-Lapu ang panimalay ni Yuri Richards o Roy Deldig sa tinuod nga kinabuhi.

Kini human nakitaan kini og sintomas sa coronavirus disease sa wala pa nitaliwan ngadto sa laing kalibutan niadtong adlaw nga Martes.

Si Chan kuyog ang mga sakop sa Lapu-Lapu City Health Office ug City Disaster Risk Reduction and Management Office nangunay sa pag-disinfect sa panimalay sa pamilyang Deldig nga nahimutang diha sa Barangay Bankal.  Gikataho nga si Yuri, 42-anyos namatay gumikan sa sakit sa kasing-kasing apan si Chan nakadawat og report nga si Yuri gihilantan, giubo, gisip-on ug naglisod og ginhawa sa wala pa kini mamatay.

Ug gumikan sa kamatayon ni Yuri gipa-quarantine ug gipa-lockdown ni Chan ang panimalay niini nga nagpasabot nga dili una makagawas ang mga kabanay ni Yuri hangtud dili mogawas ang resulta sa iyang swab test ug masuta nga negatibo sa COVID-19.

Ang hepe sa CDDRMO Nagiel Bañacia, nibutyag nga kauban ni Yuri sa ilang panimalay ang iyang 64-anyos nga inahan ug usa ka tuig nga pag-umangkon kinsa vulnerable kaayo sa virus.

Ang patay nga lawas ni Yuri gipaubos na sa cremation niadtong Miyerkules sa hapon. /IBM (BANATNEWS)