Frontliners sa Lapu-Lapu hatagan og hazard pay

CEBU, Philippines — Giuyonan sa mga sakop sa konseho sa Dakbayan sa Lapu-Lapu ang hazard pay nga tag P500 matag adlaw sa mga frontliners batok sa coronavirus disease.

Ang ordinansa nga giaprobahan sa konseho ang nagtugot sab sa retroactive nga pagkwenta sa mga adlaw sa ilang pagserbisyo sugod sa Marso 17, 2020 hangtud mahuman ang enhanced community quarantine sa siyudad.

Si Konsehal Ricardo Amores ang nangamahanan sa ordinansa nga naggahin sa mokabat sa P261 milyones base sa supplemental budget nga giangayo ni Mayor Junard “Ahong” Chan. “If a frontliner will work five days a week for a month, he can get P12,000,” matud ni Amores.

Gamiton ang maong salapi alang sa pagpalit og sinakong bugas nga ihatag ngadto sa mga pamilya nga Oponganon nga anaa sa tagsatagsa ka panimalay nunot sa ECQ.

Amelioration

Samtang mokabat sa 1.3 milyones ka pamilya ang gikatakda nga makadawat sa tag P6,000 nga social amelioration program sa Department of Social Welfare and Development sa Central Visayas isip ayuda.

Kini subay sa Republic Act No. 11469 kon Bayanihan to Heal as One Act diin matag benepisyaryo makadawat og P5,000 ngadto sa P8,000 matag buwan sugod sa Abril hangtud Mayo.

Apan ang assistant regional director sa DSWD-7, Shalaine Marie Lucero, nitug-an nga sa Central Visayas anaa sa P6,000 ang madawat sa matag pamilya base sa prevailing minimum wage sa rehiyon nga P404.

Giklaro ni Lucero nga dili tanan makadawat sa maong assistance ug mahimong goods o cash ang madawat sa mga beneficiaries.

Pangayoan sa DSWD-7 ang mga mayor sa listahan sa mga pamilyang nagtrabaho sa mga informal sector o kadtong haum gayud makadawat sa ayuda ilabi na kadtong mga kabus nga pamilya o nawad-an sa trabaho tungod sa coronavirus disease 2019

Dugang ni Lucero nga kung makadawat og ayuda gikan sa laing ahensya, kuhaan kini sa madawat nilang P6,000 sama sa assistance nga gihatag sa Department of Labor and Employment. Rowena D. Capistrano/GMR (BANATNEWS)