CEBU, Philippines — Pipila ka mga traysikol sa Siyudad sa Talisay ang gihangyo nga motabang sa pagpasakay sa publiko nga adunay quarantine pass samtang gipatuman ang Enhanced Community Quarantine.
Si Jonathan Tumulak, hepe sa City of Talisay-Traffic Operation and Development Authority (CT-TODA) nagkanayon nga aron mas daghan ang maserbisyohan sa libreng sakay ilang gihangyo ang pipila ka mga traysikol drayber aron mohatag sa ilang serbisyo.
Ang mga drayber sa traysikol nga moserbisyo dili angayang mabalaka tungod kay ang siyudad mohatag usab og tabang kanila. Ang mga drayber sa traysikol lakip usab kini nga naapektohan karon niining pagpatuman og balaod aron malikayan ang pagkuyanap pa sa covid-19.
Si Tumulak nagkanayon nga padayon nila nga gipatuman ang social distancing.
Ang mga traysikol nga mohatag og libreng sakay ang mailhan kini tungod kay ang mga drayber magsul-ob og puti nga sinena, nagkarsones ug sapatos ug ang iyang traysikol adunay gibutang nga karatola nga libreng sakay.
Gawas sa mga traysikol gipadagan usab ang 10 ka L300 van ug upat ka bus nga iya sa kagamhanan aron daghan ang maserbisyohan. Ang buhaton sa mga pasahero mao ang pagdala sa ilang QP ug mag-atang lang kini diha sa kadalanan. /BDB (BANATNEWS)