CEBU, Philippines — Gipahibawo ni Talisay City Mayor Gerald Anthony “Samsam” Gullas Jr. nga ang matag barangay maoy manghatag sa quarantine pass nga kinahanglan samtang gipaubos sa enhanced community quarantine.
Si Gullas nibutyag nga ang mga opisyal sa matag barangay maoy mopahigayon og pagpanghatag niini.
Apan ilang iseguro ang social distancing sa pagtapok-tapok hinungdan nga mas maayo nga ipanghatag kini pinaagi sa purok leaders.
Sigun pa ni Gullas nga nagka-estorya na sila ni Cebu City Mayor Edgardo Labella ug iyang gipangutana kun unsa ang dad-on sa mga Talisaynon nga moanha sa Siyudad sa Sugbo.
Siya nagkanayon nga ID lang sa ilang trabahoan maoy dad-on sa empleyado aron sila makalusot sa checkpoint.
Usa lang gyud sa matag pamilya ang gitugutan nga makakuha sa quarantine pass aron siya makapamalit og gikinahanglan.
Dugang pa ni Gullas nga daghan pa silang tukion labot sa pagpahigayon sa ECQ karong adlaw nga Lunes. /GMR (BANATNEWS)