Wa pay lockdown, ECQ ra

CEBU, Philippines — Gipasabot kagahapong adlawa ni Gobernador Gwendolyn Garcia nga enhanced community quarantine lang ang gipatuman sa lalawigan sa Sugbo ug wala gidili ang mga biyahe sa kadalanan ug paggawas sa mga panimalay.

Kini human nga naglibog ang mga tawo human niluwat ang gobernador sa iyang Executive Order No. 5-N pagpaubos sa tibook lalawigan sa Sugbo sa enhanced community quarantine tungod sa coronavirus disease (COVID-19).

Si Garcia nitataw nga ang ang restriction nga gipatuman mao lang ang pagsulod sa mga international flights sa Sugbo sugod alas 12:01 kaadlawon sa Marso 27, 2020.

Tungod sa kabalaka sa publiko nga “lockdown” na kini, nidagsa ang mga mamalitay sa mga grocery stores ug supermarkets aron mamundo.

Nabalaka sab ang mga taga probinsya nga nia sa Cebu City mao nga nagdasok ang mga pasahero North Bus Terminal ug South Bus Terminal kagahapon hangtud gabii ug wala na masunod ang social distancing.

“Wala pa tay giimplementar nga stay at home sa kadtong kwalipikado, apan magpabilin gihapon ang atong 24 hour- curfew sa tanang mga studyante ug sa tanang 65-anyos and above unless dunay medical condition nga kinahanglan siya moadto sa iyang doctor,”  matud ni Garcia.

Si Garcia niawhag sa publiko nga dili mag panic buying tungod kay dili man siradohan ang mga supermarkets ug grocery stores kay dunay paigo nga supply sa pagkaon sa probinsya.

Sa pagsulat niining balita wala pa matapos ang tigom ni Garcia uban sa mga Mayor kalabot sa dugang protocols ug guidelines kalabot sa enhanced community quarantine. Rowena Capistrano/IBM (BANATNEWS)