CEBU, Philippines — Si Gobernador Gwendolyn Garcia nagplano nga mobutang og “Bagsakan Center” sa tanang lungsod ug dakbayan sa Lalawigan sa Sugbo.
Ibaligya diha sa Bagsakan Center ang mga basic commodities nga barato ang presyo lakip na niini ang NFA rice nga P27 lang ang matag kilo.
Giklaro ni Garcia nga dili tugotan ang mga mamalitay nga makapalit og daghan aron dili kini maabuso.
Ang Kapitolyo makig-coordinate ngadto sa mga mayor alang sa maong plano.
Nunot niini, ang National Food Authority (NFA)- 7 nisiguro nga igo ra ang supply sa bugas humay sa Central Visayas ug aduna pay 138, 350 ka sako sa NFA rice nga nakapundo sa mga nagdakaiyang warehouse sa NFA dinhi sa Central Visayas.
Si Rocky Valdez, regional director sa NFA-7 nibutyag nga ang supply sa bugas sa NFA molanat pa hangtud sa mosunod nga 79 ka adlaw diin pasabot niini nga igo ra ang maong supply ug walay nasinati nga pagnihit.
Si Valdez niluwat sa maong pamahayag human sa nahitabo nga panic buying sa uban sama sa nahitabo sa Dakbayan sa Carcar ug Lungsod sa Barili tungod sa hulga sa covid-19.
Ang presyo sa NFA rice nagpabilin kini nga P27 matag kilo ug gilimitahan ra sa ahensiya ngadto sa tag lima ka kilo ang pagbaligya og NFA rice ang matag mamalitay.
Gibutyag usab ni Valdez nga anaa sa 15 ngadto sa 50 ka sako matag semana ang ilang gi-supply ngadto sa ilang mga authorized retailers samtang ang dakong bahin ilang gitagana isip buffer stock nga magamit panahon nga adunay kalamidad. Rowena D. Capistrano/BDB (BANATNEWS)