CEBU, Philippines — Giawhag ni Gob. Gwendolyn Garcia ang Department of Labor and Employment nga mohatag og assistance sa mga empleyado nga apektado ang trabaho sa coronavirus disease. Naglakip sa mga mawad-an og trabaho ang gikan sa usa ka restaurant ug manpower general services nga nahimutang sa Metro Cebu.
Matud ni Garcia nga ang DOLE adunay programa nga gitawag nga Tulong Panghanapbuhay sa Ating Disadvantaged/Displaced Workers (TUPAD).
“So I'm asking that the TUPAD Program be extended to those workers that have now reduced work days. And I hope this will be considered by the DOLE," matud ni Garcia.
Wala pa mopatuman ang Kapitolyo og flexi work sanglit nabalaka si Garcia nga maibanan ang sweldo ilabi na niadtong inadlaw ang bayad.
Sa Dakbayan sa Lapu-Lapu, si Mayor Junard "Ahong" Chan uban ang City Social Welfare and Development Office ug Department of Social Welfare and Development niapod-apod og food packs sa Olango Island.
Matud ni Annabeth Cuizon, pangulo sa CSWDO, nga 2,514 ka food packs ang ilang gidala sa isla alang sa mga apektado nga trabahante tungod sa paghinay sa mga turismo tungod sa COVID-19. Rowena D. Capistrano/GMR (BANATNEWS)