Kanhi hepe sa kapolisan sa Argao gikasohan

CEBU, Philippines – Pormal nang gipasakaan og kasong kriminal sa Integrity Monitoring and Enforcement Group (IMEG) Visayas Field Unit ug Police Regional Office 7 ang kanhi hepe sa Argao Police Station Police human nga nakigdulog ug gipagawas ang duha ka babaye’ng piniriso. Si Police Captain Neon Francis Alvarez sa IMEG Visayas Field Unit miingon nga giduso na nila ang kaso ngadto sa Municipal Trial Court (MTC) sa lungsod sa Argao batok ni Police Major Ildefonso Miranda Jr. Kasong bribery, anti-graft and corruption practices ug paglapas sa Revised Penal Code 125 tungod sa paglangan pag turnover sa dinakpan ngadto sa Cebu Provincial Detention and Rehabilitation Center (CPDRC).

Si PRO7 Deputy Regional Director for Administration Police Brigadier General Domingo Cabillan miingon human ipasaka ang kaso temporaryo nila kining ikostudiya hangtud mahuman ang paghusay sa kasong administratiba  ug criminal.

Ang PRO7 mao ang mopasaka og kasong adminstratiba batok kang Miranda ngadto sa Philippine National Police Internal Affairs Services (PNP-RIAS).  Gidakop si Miranda tungod sa pagpagawas niini sa duha ka babayeng piniriso diin ang usa mao ang 23-anyos nga iyang nahimong uyab ug gidulog sa iyang lawak diha sa presinto samtang ang 40 anyos nga babaye gihimo niyang sulogoon.  Ang duha ka babaye pulos adunay kasong pagmaligya ug pagkupot sa illegal nga drugas nga nasikop sa panahon sa gisundan nga hepe ni Miranda nga si Police Major Roger Quijano. /IBM (BANAT NEWS)