CEBU, Philippines – Makabaton na og kaugalingong museum ang Dakbayan sa Lapu-Lapu human nahingpit na ang plano sa mga opisyal sa National Historical Commission of the Philippines.
Nunot niini gipahibawo ni Mayor Junard Chan ang pagpakigtagbo nga iyang gihimo sa mga opisyal NHCP sa niaging semana alang sa hingpit na nga pagpatuman sa kaugmaran niini.
Sa mao nilang panagtagbo nahisgutan sab ang kabahin sa 1-year countdown alang sa 500th Anniversary sa Kadaugan sa Mactan Abril 27, 2021.
Matud ni Chan nga ang museum project ang tukuron isip paghatag usab sa pagpasidungog kang Datu Lapu-Lapu kinsa giila nga maoy labing unang bayaning Pilipino nga nakiggubat batok sa mga langyaw nga nagtinguha sa pag-ilog sa Mactan 500 na ka tuig ang nakalabay.
“Usa ni sa mga dakong achievements ubos sa atong administrasyon nga makatabang og daku sa atong turismo ug maghatag og trabaho sa atong mga constituents,” matud ni Chan.
Gitataw niya nga kun mahuman na unya ang kaugmaran sa maong proyekto maoy iyang gilauman nga mousbaw usab og 40 porsyento ang mga turista sa dakbayan nga bugti usab niini mao ang paghatag unya og panginabuhian sa mga molupyo niini. /GMR (BANAT NEWS)