CEBU, Philippines — Daghang mga drayber og habalhabal ang nabalaka kun mahimo na nga legal ang motor taxi kay sigurado sila nga maabot sa ilang biyahion ang mga rotang gidaganan sa mga kaparehas nilang ordinaryong habalhabal.
Si Prospero Manatad, 34, taga Tugbongan sa Lungsod sa Consolacion miingon nga kaniadto, sila ray sakyan sa mga pasahero sa mga hilit nga dapit ug kadtong ang mga agianan dili maagian og mga taxi o pasaheroang jeepneys.
Apan kun ang motor taxi sama sa Angkas mahingpit na gyud nga legal nga pasaheroan mameligro gyud ilang panginabuhi.
Dili sama sa Angkas nga fixed na ang pleti pinaagi sa apps, sila sa habal-habal sabot-sabot ra sa pasahero kun pilay pangayo. Mao nga dunay mga higayon nga mas barato ang singil sa Angkas itandi sa habalhabal nga sabotsabot ra.
Si Prospero miingon nga ang karaang motorsiklo sa namatay na niyang amahan maoy iyang gihimong habal-habal aron makatabang sa iyang inahan nga naninda sa merkado publiko sa Consolacion.
Dugang pa ni Prospero nga nalipay sila nga dili dakpon ang mga habal-habal nga moabot sa pagpamasahero sa mga siyudad sa Sugbo ug Dakbayan sa Mandaue kay midako gyud ang ilang kita.Apan kun ugaling mahimo ng legal nga motor taxis nabalaka silang pangdakpon na sila pabor aning mga legal nga pasaheroan. /IBM (BANATNEWS)