Tricycle TF gitukod sa Mandaue

CEBU, Philippines — Gimugna ni Mandaue City Mayor Jonas Cortes ang Mandaue City Tricycle Task Force sa tuyo nga mohimo kini og mga pamaagi alang sa bag-ong rota sa mga traysikol nga makalikay sa pag-agi sa mga national roads nga nagtadlas paingon sa kabarangayan.

Sa giluwatan ni Cortes nga Executive Order No. 60 maoy magsilbing chairman ang mayor sa dakbayan ug vice chairman usab ang director sa Mandaue City Police Office (MCPO) nga mao si Police Colonel Jonathan Abella.

Nunot sa katukuran sa MCTTF maoy gitahas ngadto kanila ang pagpahigayon og mga tigum isip sa pagpangonsulta sa publiko uban sa mga stakeholders sa dakbayan sa pagpahigayon og mga survey ug ocular inspection sa zone area sa mga tricycles.

Si John Eddu Ibañez, executive secretary ni Cortes, sa iyang pamahayag niingon nga ang task force maoy mohimo og mga pagtuon alang sa pagmugna og bag-o nga mga rota sa mga tricycle nga dili makaagi sa mga national highway sa ilang pagpamasahero.

Gihimo ni Cortes ang maong lakang sa dakbayan isip sa pagtuman usab sa giluwatan nga kamanduan sa Department of Interior and Local Government (DILG) niadtong Pebrero 17, 2020.

Ang direktiba sa DILG ngadto sa tanan nga mga LGUs ang naghatag lang og 30 ka adlaw nga lugway sa paghimo og mga plano alang sa bag-ong rota sa mga tricycle o gitawag og tricycle route plan.

Sa kasamtangan maoy mga rota sa mga tricycle ang gikan sa Barangay Centro paingon sa Barangay Cambaro, Looc, Opao, Umapad, Ibabao, Alang-alang ug ingon man ang Barangay Paknaan gikan sa merkado publiko.

Giklaro ni Ybañez nga ang mga tricycle nga pasaheroan ang dili mahimong wagtangon tungod kay nahimo na man kining panginabuhian sa pipila ka Mandauehanon. /GMR (BANATNEWS)