CEBU, Philippines — Gikatakda ang pagbiyahe na sa mga air conditioned modern jeepneys sa Dakbayan sa Lapu-Lapu.
Si Malvin Arias, chairman sa United Drivers-Operators Transport Cooperative (UDOTCO), niingon nga ang 20 ka modernong PUJ ang gihatagan og provisional authority nga giisip nga maoy labing unang hugna sa mga Euro-4 modern jeepneys sa dakbayan.
Nakaangkon ang UDOTCO og 50 ka units sa maong mga sakyanan sa kantidad nga P2.2 milyones ang matag usa gikan sa Hino Motors Philippines pinaagi sa loan sa Development Bank of the Philippines.
Ang kooperatiba giapilan sa 1,000 ka sakop nga gilangkuban sa mga jeepney ug tricycle drivers ug mga operators sa Central Visayas. Dugang ni Arias nga 300 ka jeepney ug tricycle drivers ug operators ang ilang sakop sa Dakbayan sa Lapu-Lapu.
Si Arias niingon nga ang 20 nila ka modernong jeepney nga magsugod na sa pagbiyahe maoy mogamit niini ang 40 nila ka drayber nga sakop sa ilang kooperatiba nga magpuli-puli pinaagi sa duha ka shifting sa matag adlaw nga pagbiyahe.
“Sa pagkakaron, among gitan-aw ang mga rota nga wala kaabot og 10 units. Mao to una nga giilisan nato sa bag-o nga units,” matud ni Arias.
Gitataw ni Arias nga ang 20 nila ka modern jeepneys ang magbiyahe sa mga rota gikan sa Marigondon sa Dakbayan sa Lapu-Lapu paingon ngadto sa merkado publiko, Punta Engaño, ug Tamiya sa Barangay Basak sa minimum nga plite nga P9.50.
Magdawat og standardized nga sweldo ang mga drayber pinaagi sa fixed rate sa matag adlaw ug wala na mag-agad kun makapila sila makatuyok sa ilang pagbiya sulod sa usa ka adlaw nilang pagpamasahero. GMR (BANATNEWS)