CEBU, Philippines – Pipila ka mga barangay nga drug cleared sa Philippine Drug Enforcement Agency (PDE)- 7 sa Central Visayas posibleng mabakwian sa maong titulo sa higayon nga mahagbong kini sa resulta sa Barangay Anti-Drug Abuse Council (BADAC) functionality audit nga gipahigayon sa Department of the Interior and Local Government.
Kini ang gitug-an sa tigpamaba sa PDEA-7 Leia Albiar-Alcantara nga nahinabi sa mga tigbalita atol sa gipahigayon nga AGIO Forum.
Matud ni Alcantara nga adunay 855 ka barangay ang drug cleared sa rehiyon-7 ug gipaubos kini sila sa tulo ka validation.
Gibutyag ni Alcantara nga nagpaabot sila karon sa resulta sa gipahigayon nga BADAC functionality audit sa DILG nga gilaumang makagawas sa unang quarter niining tuiga.
Giingong adunay posibilidad nga adunay pipila ka barangay mabakwian sa ilang pagka-drug cleared sa higayon nga dili nila mabitad ang gagmay nila nga grado sa nilabay nga assessment diin hinay ang paglihok sa ilang BADAC. Giawhag ni Alcantara nga ang mga opisyal sa barangay nga padayonon ang pagtrabaho sa ilang BADAC aron mamentinar usab ang ilang pagka-drug cleared nga barangay. /BDB (BANAT NEWS)