CEBU, Philippines – Nagpabiling missing ang 21-anyos nga apo sa retiradong judge ug asawa niini nga parehong namatay sa sunog sa sa dalan P. Burgos sa Barangay Centro sa Dakbayan sa Mandaue niadtong Lunes sa kaadlawon Pebrero 17, 2020.
Gipangita pa karon sa kabomberohan si Gerick Gestopa, 21, kinsa giingong na-missing atol sa pagkasunog sa ilang lugar ug gikamatay sa iyang mga apohan nga silang retired judge Gerardo Gestopa ug asawa niining si Louella.
Si Senior Fire Officer 2 Edgar Vergara, chief investigator sa Mandaue City Fire Station, miingon nga dili nila makonsiderar nga nakalas sa maong sunog ang apo sa duha hangtod nga di kini makaplagan. “Samtang wala pa tay nakita nga remains niya, dili gyud nato siya maingon nga casualty. Kay wala ta kahibaw og nakahunahuna ‘to ang bata nga init na kaayo unya niambak siya unya nakagawas,” pasabot pa ni Vergara.
Atol sa clearing operation ang patay’ng lawas lang sa mga apohan maoy naugkat sa mga bombero. Samtang gipahiluna sa Tabok, covered court ang kapin 200 ka tawong nasunogan sa ikaduhang sunog nga nahitabo diha sa Almer’s Compound sa maong barangay. Rowena D. Capistrano/IBM (BANAT NEWS)