CCPO nangangkon nga luwas ang siyudad

CEBU, Philippines — Gihulagway sa Cebu City Police Office nga luwas ang Siyudad sa Sugbo human sa kalampusan sa mga dagkung kalihukan.

Kini ang tubag ni CCPO Director Engelbert Soriano nunot sa giingong statistics sa pag-ubos sa siyudad sa gikan sa luwas nga mga siyudad.

Matud ni Soriano nga wala siya’y nadawat nga kasayuran sa maong statistics kung unsay gibasehan niini.

Matud ni Soriano nga luwas kaayo ang dakbayan ilabi na nagmalampuson ang Sinulog 2020 ug maayo usab ang feedback sa komunidad pinaagi usab sa tabang sa tanang katawhan.

Samtang nibisita si Soriano sa CCPO Mabolo Police Station kagahapon sa buntag aron sa pagkighinabi sa pipila ka opisyal lakip ang hepe niini nga si Police Major Dindo Alaras.

Matud ni Soriano nga tuyo lang niya nga focus sa ilang trabaho ang kapolisan ug adunay commitment ilabi na dako ang ilang area of responsibility.

Sumala pa ni Soriano nga wala niya nahinabi ang tanang personnel sa Mabolo Police Station apan anaa ra hinoon ang mga key personnel lakip ang hepe.

Maoy iyang tinguha nga kauban niya sa iyang mga plano ang kapolisan sa siyudad ug sayron nila pinaagi sa ilang kasing-kasing ang crime clock diha sa ilang tagsa-tagsa ka police station ug magmata ang kapolisan.

Gibutyag ni Soriano nga matag police station adunay lahi-lahi nga crime clock hinungdan nga dili sila angay magpatulog-tulog sa ilang trabaho ug magmabinantayon sila sa kanunay.  GMR  (BANATNEWS)