Mga polis maglatagaw gi-monitor
CEBU, Philippines — Nunot sa pagrelibo sa tulo ka police colonels tungod sa pagduwa og golf sa oras tingtrabaho gipasidan-an sa Police Regional Office 7 ang mga sakop niini nga dili maglatagaw kun sila on duty.
Matud ni Police Brigadier General Domingo Cabillan ang Deputy Regional Director for Administration sa Police Regional Office 7 nga kabahin kini sa gipatumang internal cleansing sa kapolisan aron taktakon ang mga badlongon nilang mga sakop.
“Police Regional Office 7 will strengthen its campaign to cleanse its rank and strictly punish those who will be found violating the do’s and don’ts of the chief PNP Police Brigadier General Val de Leon warns all the police officers in Central Visayas to abide by the rules and regulations of the PNP or else face the consequence,” matud pa ni Cabillan.
Kagahapong adlawa gipa-report na ngadto sa Camp Crame silang Police Colonel Dennis Artil ang hepe sa Comptroller Division , Police Lieutenant Colonel Dennis Bad-ang hepe sa Finance Service ug Police Lieutenant Colonel Glenn Mayam ang hepe sa Police Drug Enforcement Group 7 human gimando ni PNP Chief Archie Francisco Gamboa nga parelibohan ug imbestigahon ang tulo tungod sa pagduwa og golf sa oras tingtrabaho.
Wala lang una nganli ni Cabillan ang mohulip sa tulo nga gikan sa Camp Crame.
Human sa maong kontrobersiya mimando karon ang direktor sa kapulisan sa Central Visayas Police Brigadier General Valeriano de Leon sa tanan niyang personnel nga sundon ang lagda nga gipatuman sa PNP.
Adunay mga intelligence officers nga gitahasan si de Leon nga maniid niining mga polis nga mosulod sa mga balay kahilayan, pasugalan ug sa mga golf courses. –/IBM (BANAT NEWS)
- Latest
