Sunog sa Mandaue ug Balamban, 2-anyos napaig

CEBU, Philippines — Duha ka mga insidente sa sunog ang natala sa mga tinugyanan sa kabomberohan sa Dakbayan sa Mandaue ug Lungsod sa Balamban, adlaw nga Martes diin usa ka bata ang nakalas.

Unang sunog nahitabo sa may Guizo Satellite Market, Barangay Guizo, Mandaue City sa kaadlawon nga nagsugod sa stall ni Socorro Aparre ug gilamoy ang mga tupad nga pito ka stalls. Ang sunog hingpit napawong alas-7 pasado na sa buntag.

Usa ka Sabiniano Banagaso, ang nasamad sa iyang wala nga paa. Samtang gibanabanang P80 mil ang danyos sa maong sunog.

Samtang laing sunog ang niulbo sa may Upper Segra, Barangay Buanoy, Lungsod sa Balamban ug naugdaw ang upat ka mga residential buildings.

Matud pa ni Inspector Rogelio Baran, Fire Marshal sa Lungsod sa Balamban, usa ka Alvin Cabaton, 2-anyos ang nakalas human wala kini nakuha sa 13-anyos niyang maguwang kay anaa kini sa ikaduhang andana giduyan.

Gitug-an ni Baran, ang 3-anyos nga igsuon sa namatay ra ang naluwas sa maguwang kay dali kaayo nidako ang kalayo. Gisusi sa kabomberohan ang report nga bata nga nagduwa og posporo ang sinugdanan sa maong sunog. Ang inahan sa mga bata nga usa na ka biyudad giingong naglabada sa laing balay atol sa pagkahitabo.

Gibutyag ni Baran, bisan ug napaig ang maong bata ilaha gihapon kining gidala sa tambalanan.

Gawas sa managsuon nga diha sa balay atol sa pagkahitabo, duna pa silang laing duha ka igsuon nga nageskuyla ug ang usa toa sa balay sa ilang paryente.

Gibana-bana moabot ngadto sa 200mil ka pesos ang danyos sa maong sunog, nga kasagaran ginama sa light materials. /IBM (BANATNEWS)