CEBU, Philippines – Motabang ang Kapitolyo pinaagi sa Provincial Disaster Risk Reduction and Management Office ug Provincial Health Office sa Devotee City.
Matud ni Neil Sanchez, hepe sa PDRRMO, nga mopadala sila og “shadow support” sa Dakbayan sa Sugbo alang sa Devotee City.
Ang PHO mopadala sab og team alang sa paghatag og dugang medical services sa mga pilgrims gikan sa ubang lungsod ug dakbayan nga temporaryong mamuyo sa Devotee City sa may South Road Properties.
Ugma buksan ang Devotee City sa mga pilgrims nga moapil sa selebrasyon sa kapistahan ni Señor Sto. Niño ug sa Sinulog 2020.
Gibanabana nga moabot sa 2,500 katawo ang mopuyo sa Devotee City.
Samtang gibutyag sab ni Sanchez nga gipaabot nga 10 ngadto sa 15 ka lokal nga kagamhanan gawas sa Dakbayan sa Sugbo ang mopadala og responders nga motabang kugn dunay emerhensiya atol sa foot procession ug Sinulog Grand Parade.
Gawas sa PDRRMO nga magbutang og command post sa Kapitolyo ug sa Cebu South Bus Terminal, ang mga responders adto usab kini i-deploy sa nagkadaiyang stations nga giila sa dakbayan.
Awhag ni Sanchez sa mga LGUs nga mopadala og team nga magdala usab og emergency vehicles para dali ang pagbiyahe kun ugaling adunay emerhensiya. /GMR (BANAT NEWS)