CEBU, Philippines – Gisaway sa mga Sugbuanon ang paghatag sa Sinulog Foundation, Inc. og eklusibong katungod sa usa ka cable television sa pagpagawas sa footage sa Sinulog Festival 2020.
Dili pabor ilabi na kadtong anaa lang sa panimalay motan-aw sa telebisyon sa Sinulog, mga tiguwang ug mga walay ikaplite padulong sa Dakbayan sa Sugbo.
Labi na nga dili sila pabor tungod kay dili cable ang ilang connection sa telebisyon sama sa usa ka Olivia Lariosa ug mga senior citizens ug may kabilinggan sa paglakaw.
Si Jan Jayford Natad nipadayag nga dili angay ang exclusive tungod kay isip kabahin sa cultural heritage kinahanglan nga makita sa tanan.
Nunot niini si Mayor Edgardo Labella nimando nga dili na himoong exclusive ang coverage sa Sinulog 2020 sa Cebu City Sports Center.
Matud ni Labella nga ang MyTV nga adunay kontrata ilang gipapili og lugar asa sila mopahimutang.
Gibutyag sa mayor nga kung nasayud pa lang siya daan labot sa kontrata dili unta moabot sa punto nga adunay exclusivity apan tungod kay uwahi na siya nasayud ug daghan kaayong reklamo gikan sa katawhan hinungdan nga iyang gipatawag ang tanan ug gipahigayon usab ang usa ka tigum ug nasabutan ang pagwagtang na sa exclusivity ug bukas na kini sa tanan. /GMR (BANAT NEWS)