CEBU, Philippines — Gihangyo sa konseho sa Siyudad sa Sugbo ang tanang establisemento nga maagian sa Sinulog Grand Parade ug Solemn Procession nga ipagamit sa publiko ang ilang mga comfort rooms.
Ang mga establisemento mahimong maningil og bayad nga P5 hangtud P10 alang sa pagmintinar ug paghinlo sa mga CR kung sila dili makapagamit nga libre.
Matud ni Konsehal David Tumulak kinsa maoy niduso sa maong resolusyon nga kaayohan ug kahupayan kini sa mga deboto nga abton sa sugo sa lawas.
Atol sa Sinulog ang kagamhanan sa siyudad adunay ipahimutang nga mga portable toilets (portalets) sa palibot sa rota sa parada apan dili igo aron mahatagan og katagbawan ang mga personal nga panginahanglan sa pagdagsa sa mga tumatan-aw.
Ang mga portalets anaa sa lainlaing mga estasyon sa rota sa Sinulog atbang sa simbahan sa Sto. Rosario Parish, tupad sa Cebu Maternity Hospital, atubangan sa sementeryo sa Carretta ug tupad sa T. Padilla Barangay Hall. /GMR(BANATNEWS)