CEBU, Philippines — Mokabat sa 6,000 ka polis ang ipakatap sa Police Regional Office 7 atol sa Sinulog 2020.
Kini maoy gibutyag ni PRO-7 Director, Police Brigadier General Valeriano De Leon, diin usa nga tutukan nila mao ang mga kriminalidad ug terorista.
Dugang ni De Leon nga wala nila gisalikway nga mamahimong target sa teroristang grupo ang kalihukan sa Sinulog ilabi na ang grand parade ug procession nga tambungan sa mga lokal ug langyaw nga turista.
Subay niini gimanduan usab ni De Leon ang intelligence officers nga subling tutukan ang pag-monitor ilabi na sa mga hulga sa kagubot. Hinoon wala pay na-monitor ang kapolisan nga hulga apan ila na usab gipangandaman ang nagkalainlain scenario kung adunay mosuway sa paghimo sa kagubot sa Sinulog.
Samtang nakig-alayon na usab sa ilang counterpart sa laing rehiyon ang Cebu City Police Office (CCPO) alang sa pagpatabang sa pagbantay sa mga possible entry points paingon sa Central Visayas.
Lakip na niini ang tensyon sa Middle East ug hulga sa teroristang pagpangatake.
Ang kinatibuk-ang pwersa langkuban sa kapolisan sa Probinsiya sa Sugbo, Bohol, Dakbayan sa Mandaue ug Dakbayan sa Lapu-Lapu.
Matud ni CCPO Director, Police Colonel Engelbert Soriano, nga gawas sa mga polis nga mobantay sa Sinulog, aduna pay police auxiliary nga moabag kanila.
Sila ang gitahasan sa crowd control nga maoy mohawid sa pisi daplin sa karsada nga maoy rota sa Sinulog grand parade.
Gihangyo niya ang publiko nga tabangan ang kapolisan pinaagi sa pagsunod sa mga ginadili alang sa kahapsag sa pagsaulog sa kapistahan.
Sunod semana magtagbo na usab pagbalik ang maglangkub sa security ug ang tinguha nga pagngon ang signal sa tanang cellsites sa mga telephone companies. GMR (BANATNEWS)