10 ka durigista sa Talisay ug Cebu City sikop

CEBU, Philippines — Tulo ka paresan ug laing mga durugista ang nasikop atol sa managlahing operasyon sa kapolisan sa Dakbayan sa Talisay.

Unang operasyon gipahigayon diha sa Sitio Sentro, Barangay Pooc niadtong Martes sa hapon kinsa ang subject niini mao si Noel Resorna, 39-anyos apan apil sa nasikop ang iyang kapuyo nga si Roila Abellana, 37, kinsa nakit-ang nagbahig sa ginadiling drugas.

Nikabat ngadto sa P37 mil ang balor sa drugas nga nasakmit sa kapolisan gikan kang Resorna ug Abellana.

Laing operasyon gipahigayon diha sa Barangay Biasong niadtong Martes sa gabii kinsa sila si Ronald Menguito, 38, ang nasikop human kini napalitan og ginadiling drugas lakip ang kapuyo niini nga si Anabel Abellana, 37.

Nasikop usab sila si Kennith Ben Solis, 32 ug ang iyang uyab nga menor de edad; Mateo Basillote, 27 ug Marylou Alipio, 30.

Nikabat ngadto sa P105 mil ang balor sa drugas nga nasakmit gikan sa mga suspetsado.

Sa laing bahin, nagtingkagol sa detention cell sa Guadalupe Police Station si Christopher Ian Caballes, 30, residente sa nahisgutang lugar atol sa gipahigayong drug operation sa kapolisan niadtong Martes sa gabii.

Nasakmit sa kapolisan gikan sa suspetsado ang 15 gramos nga shabu nga nibalor tanan ngadto sa P102 mil. —/BDB BANAT NEWS