Unibersidad nisugot nga agian sa drainage project

CEBU, Philippines — Nitugot ang usa ka unibersidad nga moagi sa ilang luna ang drainage project sa kagamhanan sa Siyudad sa Sugbo sa may Sitio Amor, Barangay Sambag 1.

Si Atty. Augusto Go, presidente sa University of Cebu, nitugot sa gitinguhang proyekto nga kinahanglan nga moagi sa ilang luna sa may dalan J. Alcantara subay sa lay-out plan.

Si Cebu City Mayor Edgardo Labella sa iyang suwat ngadto ni Go niadtong Oktubre 9, 2019 nangayo kini og tabang ug pagtugot aron masugdan ang drainage project.

Gibutyag ni Labella nga ang pagbaha sa lugar usa sa gikabalak-an, sa mga residente.

Ang mga residente naghangyo na sa panahon ni kanhi mayor Tomas Osmeña apan wala kini nahatagi og pagtagad.

Ang maong mga residente nipadangat sab sa ilang hangyo sa Office of the Building Official (OBO).

Si City Legal Officer, Atty. Rey Gealon, niingon nga sila ang nagrekomendar sa mayor nga mohangyo kang Go alang sa kaayohan sa katawhan.

“The mayor is delighted that Atty. Augusto Go allowed the drainage project to be implemented, passing through his Sambag-1 property,” matud ni Gealon.

Gipaambit usab ni Gealon nga ang proyekto sa kanal nakita nga makunhuran ang grabe nga pagbaha sa mga silingan nga lugar nga moagi sa mga luna sa UC. /GMR (BANATNEWS)