CEBU, Philippines — Aduna nay gipangdudahan ang Cebu City Police Office nga responsable sa pagpusil patay kang Police Lieutenant Colonel Joie Yape.
Kini ang gibutyag ni CCPO officer-in-charge, Police Colonel Geovanie Maines, human sa gipahigayon nga pagsusi sa background ug mga kaso nga gikuptan ni Yape.
Matud ni Maines nga sa nagpadayon nga imbestigasyon sa Special Investigation Task Force Yape, gitutukan niini ang mga naligsan ni Yape sa kampanya batok sa ilegal nga drugas kaniadtong hepe pa kini sa Intelligence Branch sa Cebu Provincial Police Office.
Hinoon dili pa sila kahatag sa pangalan sa grupo o personalidad tungod kay wala pa silay igo nga ebidensya nga gikuptan.
Gipadali na usab ang pag-enhance sa CCTV footage nga nakuha diin gipatay si Yape samtang nakuhaan na usab nila og igo nga pamahayag ang mga nakasaksi.
Samtang gibutyag ni Maines nga wala pa nikooperar ang pamilya ni Yape sanglit gipahiluna pa ang patay nga lawas niini sa Misamis Oriental. GMR (FREEMAN)