CEBU, Philippines — Gipriso ang 37-anyos nga maestro sa Naga City Police Station nunot sa kasong pagmolestiya sa menor de edad nga estudyante sa Dakbayan sa Naga.
Giila ang maestro nga si Dennis Albiso, molupyo sa maong dakbayan.
Matud ni Police Major Leo Ty, hepe sa Naga City Police Station, nga nakadawat sila og kamanduan gikan ni Regional Trial Court (RTC) Branch 76 Judge Dennis Larobbis sa pagdakop kang Albiso sa kasong act of lasciviousness. Dugang ni Ty nga sa report nga nadawat, si Albiso kung mahuman na ang klase ulahi nga papaulion ang 15-anyos nga lalaki nga tinun-an tungod kay tudlo-an pa kini niya nga maka-catch up sa ilang leksyon.
Samtang gitudloan ni Albiso ang bata, giingong gunitan niini ang kinatawo sa bata ug dihang nibalibad gihulga nga hagbongon sa iyang grado hinungdan nga na-trauma ang bata.
Tungod sa maong hitabo niadtong Septiembyre 2018, nakita nga may gibug-aton ang reklamo sa menor de edad hinungdan nga nalutsan og warrant of arrest si Albiso. Piyansa nga P120 mil ang girekomendar sa korte batok ni Albiso. (/GMR)(BANATNEWS)