CEBU, Philippines — Mokabat sa P160,000 ang gibana-banang danyos sa naugdaw nga mga lawak-saringan sa Maribago National High School sa Dakbayan sa Lapu-Lapu dihang kalit lang niulbo ang sunog alas 4:36 sa hapon niadtong Domingo.
Si Senior Fire Officer 1 Hadji Luden Samonte nga maoy field investigator sa Lapu-Lapu City Fire District Office (LLCFDO) niingon nga alas 4:39 sa hapon ilang gipaubos sa second alarm ang sunog alang sa pagtubag sa ubang kabomberohan.
Naglakip sa nitubag nga kabomberohan sa pagtabang sa pagpawong sa kayo mao ang fire truck sa Lungsod sa Cordova, Dakbayan sa Mandaue, Emergency Rescue Unit Foundation (ERUF) ug uban pa.
Matud ni Samonte nga gideklarar nga under control na ang kayo alas 5:05 sa hapon sa maong adlaw ug hingpit na nga napawong alas 5:36 sa hapon.
Dugang ni Samonte nga sa pakisusi ilang nasuta nga nagsugod sa pagsilaob ang kayo sa canteen sa tunghaan nga ilang gituohan nga faulty electrical wiring ang hinungdan.
Si Samonte niingon nga naugdaw gyud ang 12 ka lawak-saringan nga mao unta ang klasehan sa walo ka section.
Ang apektado nga lawak-saringan mao ang sa Grade 7 hangtud sa Grade 9. GMR (BANATNEWS)