Suspek sa pagpanunggab gihigta’g alambre gipatay

CEBU, Philippines —  Suspek sa pagpanunggab sa Barangay Sinsin sa Dakbayan sa Sugbo niadtong adlaw nga Sabado ang nakit-an nalang wala nay kinabuhi ug adunay mga samad pinusilan diha sa Campo Siete, Lungsod sa Minglanilla niadtong Domingo sa gabii.

Ang gituohang gipatay mao si Jolito Aballe, taga Sitio Lantawan, Barangay Sinsin ning Dakbayan sa Sugbo. Samtang ang mamumuno wala pa mailhi, Matud pa ni Police Master Sergeant Junyl Atir, Desk officer sa Minglanilla Police Station napalgan ang biktima nga nagbuy-od sa maong lugar. Atol sa pagsusi sa lawas niini aduna kini mga samad pinusilan sa kalawasan ug gihigtan ang duha ka mga kamot niini gamit ang wire.

Sumala pa ni Atir, blangko pa ang kapulisan sa motibo sa pagpamusil ngadto sa biktima.

Apan basi sa ilang nadawat nga kasayuran ang biktima maoy gipasanginlang nanunggab kang Ronald Bonghanoy diha sa barangay Sinsin. Si Bonghanoy giingong naangol.

Ilang nasayran nga niadtong Sabado sa gabii adunay disco sa maong lugar  tungod kay pista.

Pipila ka kabhang sa wala pa matino nga kalibre sa bala ang nakuha sa crime scene nga gituohang maoy gigamit sa pagpusil patay sa biktima. Gisusi karon sa kapolisan kun may koneksyon ang pagpatay sa biktima sa pagdunggab niini kang Bonghanoy. IBM (BANATNEWS)