CEBU, Philippines – Gituohang hitman sa usa ka dakung politiko sa Sugbo ang nasikop pinasikad sa warrant of arrest sa Cebu City Mobile Force Company sa Sitio Kiwkiw, Barangay Pitalo, Lungsod sa San Fernando.
Giila ang dinakpan nga si Ryan Marikit Doncillo alyas Iti, 29, taga Barangay Lusaran, Dakbayan sa Sugbo.
Ang warrant of arrest giluwatan ni Regional Trial Court Branch 17 Judge Sylvestre Maamo Jr. sa kasong murder niadtong 2012.
Matud ni CMFC commander, Police Lt. Col. Randy Korret, nga nadakpan sab ang manghud sa akusado niadtong Nobiyembre 3 nga si Roger Doncillo sa kasong murder. Nasuta ang kaso ni Ryan dihang gi-encode sa Philippine National Police E-warrant System ang pangalan ni Roger.
Sa pakigsusi sa kapolisan sa Barangay Lusaran naabtan nila ang amahan ug gipangutana kung asa ang nahimutang ni Ryan ug gitudlo ang Lungsod sa San Fernando.
Nakig-alayon ang CMFC sa San Fernando Police Station ug Regional Intelligence Division sa Police Regional Office 7 alang sa operasyon batok sa gikonsiderar nga high-value target regional level.
Giingong nagtago-tago og pito ka tuig si Ryan human maoy gitudlo nga adunay gipatay sa bukid nga niagi lang samtang nagtanum og marijuana.
Samtang gihimakak ni Ryan nga siya usa ka hitman sa usa ka politiko sa Sugbo ug andam lang kini niya usab tubagon sa korte. Giangkon hinoon ni Ryan nga gamiton sila sa pipila ka politiko aron pagpanghadlok sa mga tawo sa bukid kung magkaduol ang eleksyon.
Gihulagway usab nga maldito ug badlongon si Ryan sa mga bukirang barangay sa Dakbayan sa Sugbo sama sa Tagbao, Lusaran, Adlaon ug mga silingan nga barangay.
Kasamtangang gitanggong sa Cebu City Police Office ang akusado. (/GMR)(BANAT NEWS)