Duha ka bombero sa BFP-7 positibo sa drug test

CEBU, Philippines —Duha ka mga bombero sa Negros Oriental ang positibo sa kinalit nga drug test nga gipahigayon sa Bureau of Fire Protection 7 niadtong nilabay nga semana sumala pa ni Regional Director Senior Supt. Gilbert Dolot, nga nahinabi sa Banat News. Matud pa ni Dolot, dul-an sa 200 ka mga sakop sa kabomberohan ang gipaubos sa random drug test ug duha ang nigawas nga positibo.

Sumala pa ni Dolot, magpaabot sila karon sa resulta sa confirmatory test sa duha ka nagpositibo.

Dugang pa ni Dolot, kun magpositibo ang duha hatagan sila og kahigayonan nga i-challenge ang resulta sa confirmatory test sulod sa 15 ka adlaw ug kung magpositibo gihapon gamit ang sus ama nga sample magatubang sila og kaso ug posibleng mataktak sa serbisyo.

Ang rehiyonal nga director nitug-an kung dili na mo challenge ang personnel nga positibo sa pagamit ug drugas mopasaka na sila og kaso. Ang randon drug test kabahin kini sa paglimpyo sa ilang han-ay gikan sa mga nalambigit sa illegal ug subay sa tinguha ni President Rodrigo Duterte gubat batuk sa ginadili nga drugas. (BANATNEWS)