CEBU, Philippines — Nunot sa nahitabong pagpanulis sud sa usa ka mall diha sa Barangay Bakilid sa Dakbayan sa Mandaue niadtong Sabado sa gabii, duha ka mga mayor sa Metro Cebu ang niawhag sa nagkadaiyang mall owners ug managers nga pagpalig-on sa seguridad sa ilang mga establisamento.
Si Mandaue City Mayor Jonas Cortes mipatawag og tigom sa mga sakop sa City Peace and Order Council (CPOC) uban sa kapolisan ug mga representante sa nagkadaiyang establisamento ilabi na sa mga malls.
Giawhag niya ang mall owners nga palig-unon ilang seguridad ug maghimo og evacuation drills kun dunay emerhensiya.
Gipanawagan sab ni Cortes ang publiko pagtaho dayon sa kapolisan kun duna silay maobserbahang mga kadudahang kalihokan diha sa ilang dapit.
Samtang si Cebu City Mayor Edgardo Labella gikatakdang makigtagbo sa mga representante sa nagkadaiyang malls, mga security agencies ug mga sakop sa kapolisan sa siyudad aron tukion ang seguridad.
Ang tigum pagatambongan ni Cebu City Police Office (CCPO) Director Gemma Vinluan ug mga private security agencies nga nagbantay sa mga nagkadaiyang establisamento.
Apil sa sutaon kun unsa ilang mga pamaaging gihimo aron pag-detect sa mga hulga diha sa ilang gibantayan lakip na ang ilang kaandam pagresponde ug pagpanalipod sa ilang gibantayang mga establisamento. Apil sa tukion ang mga armas ug uban pang gamit nila sa pagbantay.
Sa Talisay City, si Police Major Gerard Ace Pelare makigtigom sab sa mga representante sa mga establisamento aro pahinumduman sa angay nilang pagabuhaton batok sa mga tulisan.
Sumala pa ni Pelare, karong “ber months” maoy sagad isiaw sa mga tulisan. Tungod sa maong mga bulan gikan Septiyembre hangtud Disyembre ang mga tulisan nagtuong abunda sa kwarta ang mga tawo.
Matud ni Pelare kinahanglang pahugtan ug seryusohon ang seguridad sa tanang oras kay way bisan unsang orasa moigo ang mga dautang elemento.
Nagpatabang ni Labella
Sa pikas bahin, si Rodolfo Ugang Jr., residente sa Barangay Tayud sa Liloan, nidangop kang Labella kagahapong adlawa aron magpatabang aron limpyohan iyang panngalan sa kalambigitan sa maong tulis sa Mandaue City.
Ang iyang amahan, nga si Atty. Rodolfo Ugang Sr. higala ni Labella.
Si Ugang ug ang iyang pamilya nagpuyo tapad sa apartment unit nga giingong gipuy-an sa gidudahang kauban sa mga nanulis sa Mandaue. Matud pa ni Ugang duha palang ka buwan nga nipuyo ang maong mga tawo diha sa tupad nilang apartment unit.
Nabalaka siya sa ilang seguridad tungod kay adtong Domingo sa buntag dunay nangabot nga mga polis sa ilang dapit ug apil sa gitan-aw ug hapit gyud ablihi ang iyang sakyanan nga giparking diha atubangan sa ilang apartment.
Tungod sa gibuhat sa polis giduol kini ni Ugang ug giingnan nga iyaha kadto nga sakyanan. Nabalaka karon si Ugang nga basin maamong sila sa gihimong imbestigasyon tungod kay tupad sila og gipuy-an sa mga suspek. “Murag apil naman nuon ko na ilang i-investigate and under surveillance. Unya di ko gusto nga manglakaw mi sa akong pamilya, ako maglakaw ko, kaliton lang unya ko’g bunlot,” matud ni Ugang. Si Labella mitawag kang MCPO director Jonathan Abella aron pahibaw-on sa sitwasyon ni Ugang kinsa gituohang posibleng makatabang sa paghatag og dugang impormasyon bahin sa mga tulisan. (BANAT NEWS)