Nag-Headseat

Cebu, Philippines- Patay ang usa ka 14-anyos nga dalagita nga nalakip kapaig atol sa sunog nga niulbo sa may P. Del Rosario Extension, Barangay Sambag 1 ning Dakbayan sa Sugbo.

Nadawat sa kabomberohan ang maong alarma alas 2:35 sa kaadlawon ug hingpit nga napawong alas 8:20 na sa buntag.Ang sunog nagsugod sa panimalay ni Diano Flores, ug gituohan adunay appliances nga nataligam-an nga giingong nibuto. Ang hitabo ipaubos pa kini sa imbestigasyon sa mga imbestigador.

Matud pa ni Senior Fire Officer 3 Oliver Tautho, ang nakalas naila nga si Dawn Therese Awi, tinun-an sa 3rd year sa usa ka pribado nga tulonghaan nga nag-inusara sa ilang balay kay nagtrabaho ang mga ginikanan.

Nagduda si Tautho nga wala makadungog si Awi sa kaguliyang ug saba sa iyang mga silingan human nakita nga nagsuot pa kini og nasunog na sab nga headset sa dihang nakita ang napaig nga lawas niini.

Gitug-an ni Tautho, gawas sa namatay aduna usab lima ka tawo ang naangol sa maong sunog human nakaangkon ug mga paso sa kalawasan.

Gibana-bana nga moabot ngadto sa 32 ka mga panimalay ang apektado sa maong sunog ug dul-an sa 98 ka pamilya nawad-an og panimalay.

Gawas sa panimalay nga naugdaw nakan-an sab sa kalayo ang audio ug propsroom sa Cebu City Sports Center. Sumala pa ni Tautho, dul-an sa P320 mil ang bana-bana nga danyos sa maong sunog.  Daghan sa mga residente sa maong lugar ang wala kaayoy nabitbit tungod sa kapaspas ug kadali sa pagkatap sa kalayo tungod kadaghanan sa kabalayan ginama sa mga gaay nga materyales.

Ang mga nasunogan anaa kasamtangan nagpasilong sa barangay hall sa Sambag 1.

Si Mayor Edgardo Labella miabot usab sa lugar ug nasubo pagkasayod nga dunay tinun-ang nakalas.

Gimandoan ni Labella ang pangulo sa Department of Social Welfare and Services sa pagsusi gilayon sa kahimtang sa mga nasunogan aron mahatag gilayon ang dinalian nga hinabang.