Gwen wa mobilib sa ‘road clearing assessment’
CEBU, Philippines — Wala mobilib si Gob. Gwendolyn Garcia sa gihimong assessment sa Department of Interior and Local Government sa road clearing sa mga local government units.
Kini human 7 ka LGUs sa Sugbo ang giingong hagbong sa pagpatuman sa DILG Memorandum Circular 2019-121 nga mao ang Dakbayan sa Carcar ug mga Lungsod sa Badian, Compostela, Carmen, Ginatilan, Pinamungajan ug Moalboal.
Si Garcia nikwestiyon sa paagi sa rating nga gihimo sa maong ahensya sanglit wala kini mohatag og klaro nga set sa parameters alang sa paglimpyo sa mga dalan sa mga LGUs.
“Kung dunay communication, it’s the responsibility of the DILG to make things very clear, the parameters should be clearly set, expectation should be clearly set. And they have all the time to monitor, nganong September 30 na lang sila ni-warning?” matud ni Garcia.
Si Garcia nagkanayon nga walay “progressive monitoring” nga gihimo ang DILG ug kalit lang nga niingon nga kinahanglan mopatuman sa paghawan sa kadalanan.
“But I feel sa mga LGUS nga ilang gibansiwag dayun nga non-compliant, because wala man gani to kahibalo nga mga LGUs, deretso ra sila og release didto. They could have at least warned the LGU,” matud ni Garcia.
Ang paglimpyo sa kadalanan nga gimando sa DILG subay usab sa giingon ni Presidente Duterte nga paghawan sa kadalanan sa mga lugar.
Si Garcia nagkanayon nga walay klaro ang DILG sa maong programa diin iyang gihimong pananglitan ang Dakbayan sa Sugbo nga unang giingnan ni DILG Undersecretary Martin Diño apan sa resulta sa validation sa ahensya “medium compliance” lang ang Cebu City. (/GMR)(BANATNEWS)
- Latest
