Tag-iya og luna nga gitamnan og marijuana kasohan
CEBU, Philippines – Ang mga tag-iya og luna nga malarotan o gitamnan og mga marijuana ang posibleng pasakaan usab og kaso sa kapolisan.
Ang direktor sa Police Regional Office (PRO)-7 Police Brigadier General Debold Sinas nimando sa iyang legal service sa paghimo og pagtuon niini.
Matud ni Sinas nga gitinguha niya karon nga malakip sa mapasakaan og kaso kadtong mga tag-iya og luna nga malarotan o gitamnan og mga marijuana aron magmatngon kini.
Si Sinas niluwat sa maong kamandoan human adunay mga nalarot nga mga marijuana ug adunay mga nadakpan nga nananom og marijuana apan ang tag-iya sa maong luna mangangkon nga wala silay kasayoran niini.
Si Sinas buot masayod sa mga pamaagi aron maapil og pasaka og kaso ang mga nanag-iya sa mga luna.
Gihangop usab ni Sinas ang gihimo sa pipila ka mga tawo nga ni-turnover sa drugas nga walay tag-iya nga gibiyaan diha sa Barangay Zapatera, Dakbayan sa Sugbo.
Gibutyag ni Sinas nga gipasubay na niya ang tag-iya sa maong gibiyaan nga ginadiling drugas. (/BDB)(BANAT NEWS)
- Latest