CEBU, Philippines – Bisan sa pagbabag sa mga namuyo sa Yolanda housing project sa Lungsod sa Santa Fe, Isla sa Bantayan, padayonon gyud ang revalidation.
Kini ang gibutyag ni Konsehal Jayson Repaso human nasuta nga wala pa hingpit natugyan sa National Housing Authority ang maong proyekto ngadto sa lokal nga kagamhanan.
Matud ni Repaso nga sukwahi kini sa pangangkon ni kanhi mayor Jose Esgana maong gipapuy-an niya ang 1,000 ka balay niadtong naghinangat ang eleksyon sa Mayo 13, 2019.
Sumala pa ni Repaso nga ang desisyon sa pag-revalidate nahukman na sa Beneficiary Selection, Awards and Arbitration Committee (BSAAC) ug Local Inter-Agency Committee (LIAC) nga gipangulohan ni Mayor Ithamar Espinosa subay sa sugyot sa NHA. Nakaaghat sa revalidation mao ang reklamo nga daghang gipapuyo si Esgana nga iyang mga tawo bisan kung mas daghan pa unta ang angayang papuy-on nga hangtud karon wala pay balay.
“Sugot man ang uban para makita gyud kinsay nagbinuang ini,” matud ni Repaso.
Giklaro sab ni Repaso nga wala nipirma si Espinosa sa aplikasyon sa linya sa kuryente ug tubig sa maong lugar sanglit dili pa kompleto ang mga dokumento sa mga namuyo. (BANAT NEWS)