Pagsangyaw 2021 gilusad

CEBU, Philippines — Lima ka mga paring Silver Jubilarians sa Archdiocese of Cebu maoy mohatag sa pagpaambit sa Season 3 sa Pagsangyaw 2021 nga gilusad kagahapon sa buntag sa International Eucharistic Congress nga gipangulohan sa Chairman sa Commission on the Laity Fe Mantuhac-Barino.

Dul-an sa mga usa ka libo ka mga layko ang nitambong sa launching nga nagagikan sa nagkadaiyang distrito o parokya sa archdiocese.

Usa ka hamubo nga programa ang gihimo diin adunay presentation gikan sa nagkadaiyang parokya ug lakip usab gipakita ni Barino, ang pipila ka mga unod nga resulta sa segment 2 nga matapos karon Octobre 6.

Matud pa ni Barino ang Season 3 sugdan Oktobre 7 ug matapos sa Disyembre 15 nga pagaambitan sa mga silver jubilarians nga sila Bishop Dennis Villarojo; Msgr. Tony Medida; Msgr. Roger Fuentes; Msgr Ruben Labajo ug Msgr. Marnel Mejia.

Sumala pa ni Barino, ang ipaambit naglangkob sa the call to integral renewal of the person, Icon of Trinitarian Love and Communion, Church, ug uban pa The Biblical Family at ang Pamilyang Pinoy . Ang mopaila sa Segment 3  mao ang bag-ong natudlo nga Obispo sa Malolos Bulacan nga si Bishop Villarojo.

Mapasalamaton si Barino sa tanang mga nagpahigayon sa pagsangyaw ug nidasig sa uban mga parokya sa pagpahigayon sa maong kalihukan subay sa umaabot nga 500 ka tuig nga Kristyanismo sa nasud.

Atol sa maong launching gilusad usab ang umaabot nga t.v program sa pagsangyaw 2021 nga makita sa CCTN.

Samtang si Msgr. Roger sa iyang wali iyang gidasig ang mga magtutuo ug isip magsasangyaw nga dili magpakabuta sa pagtabang sa panginahanglanon sa uban, sa matag pagsangyaw kinahanglang anaa ang kalooy ug gugma ug sa katapusan dili gayud makalimot sa pagpatabang sa queen of evangelization ang mahal nga Birheng Maria. (/IBM)(BANATNEWS)