CEBU, Philippines — Nipadayag sa ilang pagsupak ang mga biktima sa sunog niadtong Hunyo 27, 2019 sa giplano karon sa kagamhanan sa Dakbayan sa Mandaue nga pagpatukod og medium rise building nga mao na unya ang ilang pinuy-anan.
Ang mga sakop sa Tipolo Urban Poor Dwellers Association ang nagpahigayon og tigom niadtong niaging adlaw diin kasagaran kanila ang nipadayag sa ilang pagsupak sa giplano karon sa kagamhanan sa siyudad.
Si Fabian Vergel, presidente sa TUPDA nagkanayon nga tinguha nila nga sila lang nga mga molupyo sa usa ka ektaryang luna ang magbahinbahin alang sa pagpatukod og ilang kaugalingon nga mga balay.
Matud ni Vergel nga silang mga orihinal nga sakop sa TUPDA nga nagpuyo sa maong luna mao lang usab ang makabalik sa pagpatukod sa ilang mga balay. Giingong ang kagamhanan sa maong dakbayan nagplano sa pag-develop sa maong lugar ug magpatukod sa medium rise building nga puy-an sa mga biktima sa sunog apil na kadtong mga nahikling gikan sa daplin sa sapa o danger zone area.
Si Vergel nipasangil nga gi-harass sila sa demolition team sa siyudad diin giguba ang gitukod nila nga payagpayag nga tapokanan sa mga opisyal ug sakop sa ilang organisasyon. (/BDB)(BANATNEWS)
Sikyu nagpabuto og armas sikop
Dina Perez
CEBU, Philippines — Nagtingkagol sa detention cell sa Abellana Police Station ang usa ka security guard kinsa giingong nagpabuto sa iyang armas atol sa ilang panag-away sa iyang asawa niadtong Biyernes sa gabii diha sa Barangay Kamputhaw, Dakbayan sa Sugbo.
Nasikop si Ryan Cuevas Callo, 44-anyos, residente sa Barangay Lahug, Dakbayan sa Sugbo kinsa giingong hubog ug nagpabuto sa iyang armas.
Gikatahong usa ka negosyante ang ni-report sa kapolisan diha sa Abellana Police Station sa giingong pagpagawas ug pagpabuto og armas ni Callo.
Nasakmit sa kapolisan gikan kang Callo ang kalibre .38 nga revolver nga walay lisensiya nga dunay duha ka kabhang sa bala diha sulod sa cylinder niini.
Ang suspetsado giingong nibutyag nga aduna sila’y personal nga gibangian ug ang iyang asawa ug niadtong higayona nakainom siya.
Si Callo giingong nangangkon nga ang revolver nga iyang gigamit sa security agency kini nga iyang gitrabahoan. (/BDB)(BANATNEWS)