CEBU, Philippines — Usa ka lalaking giingong nisuway pagsuborno sa kapulisan aron makalingkawas sa kaso ang iyang mga kabanay nga una nang nadakpan tungod sa pagsugal.
Ang gidakop tungod sa pagpanuborno mao si Federico Dejos Antig , 43, nga taga Sitio Sambagan, Brgy. Tabunok, Talisay City. Una niini, ang grupo nila ni Police Captain Nazarino Emia, deputy chief sa Talisay City Police Station nidakop sa tulo ka mga lalaki nga ilegal nga nagsugal sa ilang lugar.
Ang buot unta niyang mapagawas pinaagi sa suhol mao silang Juanito Dejos Antig, 57; Fernando Mancia Antig , 29; ug si Teofilo Dejos Antig , 52; pulos nagpuyo sa Sitio Sambagan, Brgy. Tabunok, Talisay City.
Gumikan sa sumbong sa mga nagpakabanang mga tawo nadakpan ang magsuon ug ilang pagumangkon nga nagpahigayon og ilegal nga swertres.
Sa dihang nahibawo si Federico nga nasikop ang iyang mga maguwang ug pag-umangkon dali siya nga misunod sa Talisay City Police Station.
Matud pa ni Emia nga nitunol si Federico og P40 mil sa iyang mga sakop diha sulod sa ilang buhatan ug mihangyong pabuhian ang iyang mga kabanay.
Wala na maglangan ang kapulisan ug gidiretso pagsignit si Federico ug gipaslak kini kauban sa iyang mga kabanay.
Nagkanayon si Emia nga nainsulto sila sa pagsuway og suborno kanila ni Federico. Gikatakdang pasakaan og kaso ang mga dinakpan sa sunod semana. (/IBM)(BANATNEWS)