CEBU, Philippines — Retiradong polis gipusil patay sa Lungsod sa Argao samtang padulong na mouli sa ilang panimalay sa lungsod sa Dalaguete.
Ang biktima nga nakalas mao ang retirado nga si Police Senior Master Sergeant Jesus Rudston Villahermosa, 56, taga Cawayan, Dalaguete ug kanhi nadestino sa Intelligence Division sa Police Regional Office 7.
Ang biktima giingong gikan sa Poblacion, Argao kuyog si Robert Parane sakay ang duha sa motorsiklo nga gimaneho ni Villahermosa.
Apan pag-abot sa maong lugar nakurat ang sakay niini kay kalit silang nisarasay ug maoy nakit-an niini nga nagkadugo na si Villahermosa.
Ang sakay ni Villahermosa giingong wala gyud nakakita kun kinsa ang nipusil sa biktima tungod sa kakalit sa maong panghitabo.
Gidala dayon si Villahermosa sa Isidro Kintanar Hospital apan gideklarar kining patay na.
Duha ka kabhang sa kalibre 45 nga bala ang nakuha diha sa crime scene nga maoy gituohang gigamit sa pagpusil sa biktima.
Matud pa ni Patrolman Jade Perocho, Desk officer sa Argao Police Station blangko pa gyud sila kun unsay motibo sa pagpatay sa maong kanhi polis. (/IBM)(BANATNEWS)