‘Haze’ gikan sa Indonesia
CEBU, Philippines – Gikompirmar sa Environmental Management Bureau nga dunay haze sa Metro Cebu gumikan sa nahitabong forest fire sa nasud nga Indonesia.
Sigun sa hepe sa Environmental Monitoring and Enforcement Division sa EMB-7, Engr. Cindy Pepito-Ochea, nga base sa ilang map ug sa mga partners nila sama sa PAGASA, dunay haze sa Metro Cebu tungod kay napadpad sab kini sa kusog nga hangin.
Sigun ni Ochea nga kagahapon sa kadlawon nisaka gyud ang ilang reading sa Particulate Matter 2.5.
Alas 8 kagahapon sa buntag nilapas na ang ilang guideline value gikan sa 50 nga maoy standard ug niabot kini og 56 nga matud pa unhealthy kini.
Giawhag ni Ochea ang publiko nga magmainampingon ilabi na kadtong sensitibo kaayo sama sa pagsul-ob og N95 mask o kaha ang surgical mask butangan og panyo nga umog aron mopilit ang abog ug kun mahimo kung wala’y importanteng tuyo sa gawas magpabilin nalang sa balay.
Asoy ni Ochea nga tulo ka klase sa particulate ang ilang gi-monitor sa Rehiyon 7 nga gilangkuban sa Total Suspended Particulate (TSP), Particulate Matter 10 ug Particulate Matter 2.5.
“Ranking ni siya sa gidak-on, ang pinakadako ug pinaka-visible is ang TSP like for example magbakbak og dalan or unpaved roads kana TSP na atong makita, PM 10 is 30 times smaller sa strand sa imong hair so that’s small already but ang pinakagaan ug pinakagamay nga particulate nga dili na gyud makita which is harmful kay mosulod na gyud sa sistema sa lawas and mao na siya atong kuan labi na ang ma-attack ana is ang sensitive group gyud nato,” asoy ni Ochea.
Gitataw ni Ochea nga niabot na gyud ang haze sa Metro Cebu pero ang ilang gibantayan mao ang volume sa pollutants nga ilang gitan-aw kun naa lang kini sa safe level wala’y problema apan ilang gikahadlokan nga kun moabot na og boarder line sama sa 40 o 50 nga duol na sa standard diha na sila magsige og warning. (/GMR)(BANAT NEWS)
- Latest
