Duha ka police sub-stations sa Talisay giinugurahan
CEBU, Philippines — Duha ka police sub-station ang dungan nga giinugurahan sa Dakbayan sa Talisay niadtong Lunes sa hapon.
Ang maong mga sub-station nahimutang diha sa Barangay Lawaan 1, tapad sa ilang barangay hall samtang ang usa diha sa Barangay Bulacao diin ang karaang barangay hall ang gihimong police sub-station.
Si Police Major Orlando Carag, Jr., hepe sa Talisay City Police Station nipadayag sa iyang kalipay ug nagpasalamat sa duha ka kapitan nga nipakita og interest sa tinguha nga kahatagan og kahapsay ug kalinaw ang ilang lugar tungod sa presensiya sa kapolisan.
Si Carag nagpasalamat usab kang Mayor Gerald Anthony “Samsam” Gullas, Jr. kinsa nihatag og suporta kanila sa pagpahiluna sa nahisgutang duha sa police sub-station.
Ang nahisgutang duha ka barangay mao ang agianan paingon sa sulod ug gawas sa siyudad.
Gilauman nga tungod sa maong mga sub-station dali nang marespondehan mga mahitabong insidente.
Si Brigadier General Debold Sinas, direktor sa Police Regional Office (PRO)-7, Police Colonel Roderick Marinao ug Gullas ang nitambong sa inugurasyon sa nahisgutang police sub-station. (BDB) (BANAT NEWS)
- Latest