CEBU, Philippines — Giawhag ni Mayor Gerald Anthony “Samsam” Gullas, Jr. sa Siyudad sa Talisay ang kabataan sa pagkat-on sa pagpananom og pagkaon sa mga utanon.
Matud ni Gullas nga dili mahimo nga magsige nalang og kaon sa mga processed food ang kabataan tungod kay wa kini maayong ikahatag sa lawas.
Aron nga maagni ang mga kabataan sa iyang tinguha nga pagtanom og mga utanon iyang gilusad ang iyang programa nga “Gulayan sa Paaralan” diha sa Jaclupan Elementary School sa niaging semana.
Si Gullas nagkanayon nga mahimong nindot tan-awon ang mga pananom apan ang mas labing maayo mao ang paghatag sa kabataan og maayong panglawas gumikan sa pagkaon sa mga utanon.
Ang kalihukan gitambongan sa kadagkoan sa Department of Education sa Talisay City Division.
Makatabang usab ang maong programa alang sa pagtampo sa kaayohan sa kalikupan.
Ang Department of Agriculture (DA) maoy motudlo sa mga magtutudlo ug mga tinun-an sa paagi sa pagtanom og mga utanon. (/BDB)(BANATNEWS)